മറക്കാന്‍ പറ്റുമോ അതൊക്കെ അത്ര പെട്ടെന്ന് എന്താ ലെ .

ആഘോഷങ്ങളുടെ ലോകകപ്പായിരുന്നു 2010-ലേത്. ആഫ്രിക്കയിലേക്ക് ആദ്യമായി വിരുന്നെത്തിയ ലോകകപ്പ് എന്ന പ്രത്യേകത ഉണ്ടായിരുന്ന ആ ലോകകപ്പിലെ മറക്കാനാകാത്ത് പേരാണ് ദക്ഷിണാഫ്രിക്കൻ താരമായ സിഫ് ഷാബലാലയുടേത്. ആഫ്രിക്കൻ ഭൂഖണ്ഡത്തിലെ ആദ്യ ലോകകപ്പ് ​ഗോളിന് ഉടമയാണ് ഷാബലാല.2010- ലോകകപ്പിലെ ഉദ്ഘാടന മത്സരം ദക്ഷിണാഫ്രിക്കയും മെക്സിക്കോയും തമ്മിലായിരുന്നു. അതിഥേയ രാജ്യമായ ദക്ഷിണാഫ്രിക്കൻ നിരയിൽ അന്ന് ലോകമറിയുന്ന ഒരു താരമേയുണ്ടായിരുന്നുള്ളു. ഇം​ഗ്ലീഷ് ക്ലബ് എവർട്ടന്റെ സ്റ്റീവൻ പീനാർ. എന്നാൽ ചരിത്രനിയോ​ഗം ഷാബലാലയ്ക്കായിരുന്നു.മത്സരത്തിന്റെ 55-ാം മിനിറ്റിൽ പുതിയ ചരിത്രം എഴുതി ഷാബലാല ഇടങ്കാൽ കൊണ്ട് തൊടുത്ത ബുള്ളറ്റ് ഷോട്ട് മെക്സിക്കൻ വലയിലേക്ക് കയറി. ​ഗാലറി ഇരമ്പിയാർത്തു.

ആഫ്രിക്കയിലെ ആദ്യ ലോകകപ്പ് ​ഗോളിനുടമ എന്ന് ഷാബലാലയുടെ പേരിനൊപ്പം ചരിത്രം എഴുതിച്ചേർത്തി. മറ്റാർക്കും ഒരിക്കലും തകർക്കാനാകാത്ത നേട്ടം. ഫിഫയുടെ മികച്ച ​ഗോളിനുള്ള മത്സരപ്പട്ടികയിലേക്ക് ഷാബലാലയുടെ ​ഈ ഗോൾ നാമനിർദേശം ചെയ്യപ്പെട്ടു.വിങ്ങറും അറ്റാക്കിങ് മിഡ്ഫീൽഡറുമായ ഷാബലാലയുടെ കരിയറിലെ ഏറ്റവും മികച്ച വർഷമായിരുന്നു 2010. ലോകകപ്പിലേതുൾപ്പെടെ നാല് ​ഗോളുകളാണ് ആ വർഷം താരം നേടിയത്. ദക്ഷിണാഫ്രിക്കയിലെ ഏറ്റവും മികച്ച ഫുട്ബോളറായും ഷാബലാല ആ വർഷം തിരഞ്ഞെടുക്കപ്പെട്ടു. 2006-ൽ അന്താരാഷ്ട്ര ഫുട്ബോളിൽ അരങ്ങേറ്റം കുറിച്ച ഷാബലാല ഇതുവരെ ദക്ഷിണാഫ്രിക്കക്കായി 91 മത്സരങ്ങൾ കളിച്ചിട്ടുണ്ട്. ദക്ഷിണാഫ്രിക്കൻ പ്രീമയർ ലീ​ഗ് ക്ലബ് കൈസർ ചീഫിന്റെ നായകൻ കൂടിയായണ് ഷാബലാല‌.